ЭКОЛОГИЯ-БИОЛОГИЯ ҮЗӘГЕНДӘ ТӘРБИЯЛӘНҮЧЕЛӘР ХӘРБИ ДАН МУЗЕЕНДА БУЛДЫЛАР

Ел саен 9 декабрьдә Россиядә Ватан Геройлары көне билгеләп үтелә. Бу Ватанны, аның тынычлыгын, иминлеген һәм абруен саклауда батырлык, каһарманлык һәм фидакарьлек күрсәткән һәркемгә багышланган истәлекле дата. Истәлекле датаны бәйрәм итү кысаларында Балалар экология-биология үзәгендә укучылар өчен Хәрби дан музеена экскурсия оештырылды, анда Әфган һәм башка сугышлар белән бәйле экспонатлар тәкъдим ителгән.

Музейда 100дән артык экспонат тупланган: хәрби кирәк-яраклар, корал һәм армия җиһазлары, газета материаллары, фотосурәтләр һәм тарихи документлар. Уникаль экспонат - трофейлар арасында 100 патронлы дошман патронтажы, армия каешы һәм документлар өчен күн планшет та бар.