АЛАБУГА РАЙОНЫНДА ЯЗГЫ ТАШУГА ӘЗЕРЛӘНӘЛӘР
Район башлыгы Рөстәм Нуриев язгы ташуларны искәртү темасына багышланган киңәшмә үткәрде, анда Башкарма комитет, коммуналь һәм юл хезмәтләре белгечләре, Гадәттән тыш хәлләр министрлыгы хезмәткәрләре, шулай ук авыл җирлекләре башлыклары катнашты.
Очрашуда төп игътибарны су басуларны кисәтүгә бирделәр. Узган ел белән чагыштырганга быел кыш айларында ике тапкырга күбрәк кар яуды, бу су басу куркынычын арттыра. Әлеге вәзгыятьне исәпкә алып, дренаж системаларын, су агымнарын һәм яңгыр сулары агу урыннарын тикшерү һәм әзерләү буенча чаралар планлаштырылган. Шулай ук, суның ирекле агып китүен тәэмин итү өчен елгалар һәм чокыр үзәннәрен чистарту эшләре башкарылачак.
Әзерлек эшләре шушы көннәрдә башланачак һәм язгы ташулар сезоны башланганчы дәвам итәчәк. Шунысын да билгеләп үтәргә кирәк, барлык хезмәтләр һәм оешмаларның актив хезмәттәшлеге язгы ташу белән бәйле куркынычларны нәтиҗәлерәк хәл итәргә мөмкинлек бирәчәк.