А. С. ПУШКИН ИСЕМЕНДӘГЕ ҮЗӘК КИТАПХАНӘ 130 ЕЛЛЫК ЮБИЛЕЕН БИЛГЕЛӘП ҮТТЕ

"Йолдызлык" мәдәни үсеш үзәгендә А.С. Пушкин исемендәге Үзәк китапханәнең 130 еллык юбилеена багышланган матур бәйрәм узды. "Дуслар даирәсендә юбилей" дип аталган чарага бик күп кунаклар җыелды, алар арасында төрле оешма, җәмгыять вәкилләре, ветераннар, шулай ук китапханәне яратучылар һәм укучылар да бар иде.

Юбилярлар исеменә бик күп җылы сүзләр һәм ихлас котлаулар яңгырады. Кич буе кунаклар китапханәнең озак еллар дәвамында яшәп килгән тормышы һәм эшчәнлеге турында мавыктыргыч хикәяләр тыңлады. Китапханә өлкәсе ветераннарының хезмәтләре аеруча җылы билгеләп үтелде.

Иҗади яшь бию ансамбльләре бәйрәмне үзләренең матур номерлары белән бизәделәр, бәйрәм һәм шатлык атмосферасы тудырдылар.